Hoxe, 18 de decembro, preséntase no Auditorio Municipal de Ourense o proxecto “EBA 5.0“, que materializa a editorial Difusora de Letra, Artes e Ideas coa edición dun LIBRO+CD+DVD no que todo xira arredor da figura de Eduardo Blanco Amor e a súa “A Esmorga”.

Guezos foi chamado para colaborar xunto con outras bandas nesta aventura. A nosa particular aportación ó proxecto foi a nosa “Esmorga”, que escoitastes no disco “Oito Destinos”. Desta vez foi gravada á calor dunha banda de percusión ourensá, os Percutores, para formar parte do DVD EBA 5.0.

Así que si queredes ver de que vai todo isto, vémonos ás 23:00 h. no Auditorio Municipal de Ourense. Ata loguiño!

Agora si. Visitade a sección Descargas, onde atoparedes un pequeno agasallo. Todos os temas do noso último disco Oito Destinos xa están dispoñibles para a súa escoita e descarga.

Levádeos con vós e compartídeos sen medo co mundo enteiro (pois lembrade que están editados baixo unha licencia Recoñecemento-Compartir igual Creative Commons).

Se non nos vistes estes últimos días será porque andivemos por aí tomando o sol e mollando os pés no Atlántico ou en calquera río máis fresquiño que as augas da nosa sulfurosa Chavasqueira.

O caso é que agora que voltamos destas vacacións vemos como os nosos pequenos, que hai dúas semanas estaban preparados para abandonar o fogar e espallarse coma a gripe por estas terras galegas, marcharon xa ós seus destinos e alí están agardando a que algún de vós os leve á casa.

Como ben sabemos, moitos aínda non vos puidestes facer con un deles, así que aquí vos deixamos unha lista dos puntos de venta onde xa podedes atopar o noso último traballo “Oito Destinos” polo mesmo prezo de sempre, 10 euriños.

OURENSE | La Región · Peggy Records · Livraría Torga
ALLARIZ | A Tulla
VERÍN | Zinemusik
MELIDE | Muxica Tenda Xoven
LUGO | Don Disco · Discos Cede

E próximamente tamén en Carballiño, Xinzo da Limia, O Barco de Valdeorras, Cacabelos (León), Monforte de Lemos, etc.

“En agosto, nin viño, nin muller, nin mosto” reza un dito galego supoñemos que moi antigo, porque bastaría un pequeno paseo polas vilas, aldeas e cidades galegas, para que as sabias xentes que crearon este refrán se retractaran nun abrir e pechar de ollos. Será por mulleres e viño… há! Eso sí, mosto vese ben pouco.

E diredes, que ten que ver esto con Guezos? Boa pregunta.

Resulta que despois de descansar, a medias, en xullo, voltamos agora en agosto para tocar en festas nas que non abonda nada o mosto, aquí vos deixamos unha pequena escolma que se irá actualizando na sección “Concertos” segundo nos vaian confirmando datas.

Saúdos.

• 1 de agosto 2009 Concerto en Catoira, Pontevedra
• 7 de agosto 2009 Concerto na Festa dos Botes, Arzúa, A Coruña.
• 8 de agosto 2009 Concerto en Porriño, Pontevedra

E UNHA DATA MÁIS!

• 15 de agosto 2009 Concerto en A Barrela, Lugo.
  

Impulsados coa inercia que nos deu a Xira Oito Destinos difícil vai ser agora estarmos quietos. Aquela fame que ruxía nos nosos bandullos converteuse en gula e non pensamos parar ata estar ben cheos de todo o que nos gusta.

Eso si, queremos que veñades todos connosco para facer de cada noite unha verdadeira festa.E si non sabedes por onde andamos non vos preocupedes, que xa vos iremos deixando unhas pedriñas para que poidades seguirnos o rastro este mes de xuño.

|

|

|

|

|

Aí os tedes, dous temas recén feitos, aínda fumegantes, do disco Oito Destinos que se suman á lista da nosa sección de descargas.

Desta vez os elexidos foron A Esmorga e Identidade.

E si queredes escoitar máis estade atentos, porque a sección seguirá medrando con outros temas do noso último traballo.

Bo proveito!!

Comezou a xira Oito Destinos e xa non hai volta atrás!
Arrancou onte en Santiago de Compostela e aproveitamos a viaxe para pasarnos pola Radio Galega e parolar un pouco con Vituco Neira do novo disco e de moitas cousas máis.
Apurade mentres aínda estea dispoñible para escoitar a Guezos en Aberto por Reformas.

Coa chegada da primavera os bechos saen dos seus agochos e Guezos, que non é menos, sae tamén a ver ese sol que se empolicou aí arriba. Pasamos o inverno na escuridade da tobeira, fóisenos o frío entre composición, gravación e ensaio e agora que saímos ó mundo dámonos conta de que o que temos é moita fame, fame de directo, de xente e de troula!

Esta mesma fin de semana damos comezo á Xira de presentación do noso último disco Oito Destinos cos concertos en Santiago de Compostela e a Ramallosa (Nigrán).

Xa podedes consultar todas as datas previstas para os dous próximos meses. Agora non tedes escusa para non achegarvos a compartir unha noite con nós no local da esquina.

Xa vos podemos adiantar que o novo disco de Guezos “Oito Destinos” vai camiño da fábrica. Esperamos que para finais deste mes ou comezos de abril esté xa dispoñible para todos vós. Desde aquí anunciaremos todas as novas relacionadas co tema.

De momento, coma adianto, deixámosvos o título das cancións que figuran no disco:

• Guezada
• A Esmorga
• Acción - Reacción
• Identidade
• Todo Perfecto
• Vals do Regueiro
• Amodo
• Terradentro (vers. 2009)

Acabamos de saír do estudio de gravación e xa voltamos ós escearios.

Desta vez, e de xeito especial, faremos un concerto curto en duración pero seguro que moi intenso.

Estaremos apoiando a causa de GALIZA NON SE VENDE, plataforma que trata de defender os ecosistemas litorais de Galicia, entre outras moitas actuacións de carácter ecoloxista. É interesante que lle botedes unha ollada á páxina deste colectivo.

Por outra banda, hoxe, preto das 7 e media, na cadea SER de Ourense, o noso compañeiro e amigo Ico (O Sonoro Maxín) entrevistará a un membro do grupo para comentar as novas que rodean a Guezos: novo disco, xira de presentación, etc.