Guezos. Diario de Terradentro

De Esmorga na Praza Maior

admin — Mon, 14 Jun 2010 22:47:50 +0000

Unha vez máis estaremos recordando a un dos grandes escritores que pariu esta cidade nosa, Eduardo Blanco Amor, e en concreto a súa obra “A Esmorga”.

O espectáculo que nos agarda será moi similar ao que xa puides ver no Auditorio Municipal en decembro. Desta, o lugar escollido é a Praza Maior, e de compañeiros de escenario temos a Animales Domésticos, a Banda Municipal de Ourense, a Banda Ourensons, Burgas Beat, Gomes Mouro, Magritte, María do Ceo, Perqtores, Sólidos Galicianos e O Sonoro Maxín.

Seguide ós cabezudos que andarán a ruar este xoves pola ruta da Esmorga ata a Praza Maior e quedádevos con nós das 23:00 á 1:00 para disfrutar de todo o que o Festival EBA 5.0 nos ten preparado.

Dez Primaveras en Ourense

admin — Sat, 29 May 2010 13:46:39 +0000

Remata maio e a Xira Dez Primaveras chega ao seu fin. E non podía acabar sen pasar por Ourense. E é que en nengún sitio como na casa! Por iso queremos celebralo ao grande.

Xa está todo a punto para que comece a festa… Acompañarannos na noitiña os Perqutores para entrar en calor, e por se iso non é dabondo, podedes tamén achegarvos á barra a por un pouco do licor café e bica que se servirán de balde (ata fin de existencias, larpeiros!).

Se o tempo acompaña, vémonos esta noite ás 22:30 na Praza de San Marcial (onde o Grándola). Ata loguiño!

Xira Dez Primaveras

admin — Fri, 02 Apr 2010 11:26:38 +0000

Un ano máis, coa chegada da primavera, bótámonos á estrada cos trebellos todos ó lombo coa intención de levar a nosa música a todos os recunchos desta terra galega. Baixo o nome Dez Primaveras, esta xira “indoor” contará con nove destinos que repartidos entre os meses de abril e maio.

O listado completo dos concertos e todos os seus detalles podedes consultalos na nosa sección de Concertos.

Animádevos e achegádevos a pasar con nós unha noitiña. Prometemos sorprendervos coas nosas últimas creacións.

Oito Destino agora tamén dispoñible n’A Regueifa

admin — Sat, 13 Feb 2010 12:36:38 +0000

Para os que aínda non a coñezades, “A Regueifa Plataforma é un netlabel sen ánimo de lucro dende o que todos aqueles creadores e creadoras que o desexen poden difundir, distribuir e amosar a súa obra libremente.”

Desde hoxe “Oito Destinos” forma parte da colección da Regueira Netlabel, para que poidades descargalo desde a vosa casa coa carátula incluída. E de paso recoméndovos dar un paseíño pola web onde poderedes descubrir outros traballos de grupos galegos que tamén están a traballar duro para poder chegar a todos vós.

EBA 5.0

admin — Fri, 18 Dec 2009 15:17:08 +0000

Hoxe, 18 de decembro, preséntase no Auditorio Municipal de Ourense o proxecto “EBA 5.0“, que materializa a editorial Difusora de Letra, Artes e Ideas coa edición dun LIBRO+CD+DVD no que todo xira arredor da figura de Eduardo Blanco Amor e a súa “A Esmorga”.

Guezos foi chamado para colaborar xunto con outras bandas nesta aventura. A nosa particular aportación ó proxecto foi a nosa “Esmorga”, que escoitastes no disco “Oito Destinos”. Desta vez foi gravada á calor dunha banda de percusión ourensá, os Percutores, para formar parte do DVD EBA 5.0.

Así que si queredes ver de que vai todo isto, vémonos ás 23:00 h. no Auditorio Municipal de Ourense. Ata loguiño!

Ceibamos todos os temas de Oito Destinos

admin — Sat, 26 Sep 2009 16:02:08 +0000

Agora si. Visitade a sección Descargas, onde atoparedes un pequeno agasallo. Todos os temas do noso último disco Oito Destinos xa están dispoñibles para a súa escoita e descarga.

Levádeos con vós e compartídeos sen medo co mundo enteiro (pois lembrade que están editados baixo unha licencia Recoñecemento-Compartir igual Creative Commons).

Oito Destinos xa dispoñible en tendas!

Anxo — Mon, 31 Aug 2009 23:11:58 +0000

Se non nos vistes estes últimos días será porque andivemos por aí tomando o sol e mollando os pés no Atlántico ou en calquera río máis fresquiño que as augas da nosa sulfurosa Chavasqueira.

O caso é que agora que voltamos destas vacacións vemos como os nosos pequenos, que hai dúas semanas estaban preparados para abandonar o fogar e espallarse coma a gripe por estas terras galegas, marcharon xa ós seus destinos e alí están agardando a que algún de vós os leve á casa.

Como ben sabemos, moitos aínda non vos puidestes facer con un deles, así que aquí vos deixamos unha lista dos puntos de venta onde xa podedes atopar o noso último traballo “Oito Destinos” polo mesmo prezo de sempre, 10 euriños.

E próximamente tamén en Carballiño, Xinzo da Limia, O Barco de Valdeorras, Cacabelos (León), Monforte de Lemos, etc.

En Agosto…

Anxo — Mon, 27 Jul 2009 13:35:54 +0000

“En agosto, nin viño, nin muller, nin mosto” reza un dito galego supoñemos que moi antigo, porque bastaría un pequeno paseo polas vilas, aldeas e cidades galegas, para que as sabias xentes que crearon este refrán se retractaran nun abrir e pechar de ollos. Será por mulleres e viño… há! Eso sí, mosto vese ben pouco.

E diredes, que ten que ver esto con Guezos? Boa pregunta.

Resulta que despois de descansar, a medias, en xullo, voltamos agora en agosto para tocar en festas nas que non abonda nada o mosto, aquí vos deixamos unha pequena escolma que se irá actualizando na sección “Concertos” segundo nos vaian confirmando datas.

Saúdos.

1 de agosto 2009 Concerto en Catoira, Pontevedra
7 de agosto 2009 Concerto na Festa dos Botes, Arzúa, A Coruña.
8 de agosto 2009 Concerto en Porriño, Pontevedra

E UNHA DATA MÁIS!

15 de agosto 2009 Concerto en A Barrela, Lugo.

Xuño quente

admin — Wed, 03 Jun 2009 20:31:30 +0000

Impulsados coa inercia que nos deu a Xira Oito Destinos difícil vai ser agora estarmos quietos. Aquela fame que ruxía nos nosos bandullos converteuse en gula e non pensamos parar ata estar ben cheos de todo o que nos gusta.

Eso si, queremos que veñades todos connosco para facer de cada noite unha verdadeira festa.E si non sabedes por onde andamos non vos preocupedes, que xa vos iremos deixando unhas pedriñas para que poidades seguirnos o rastro este mes de xuño.

Para levar ou tomar?

admin — Sun, 12 Apr 2009 22:19:15 +0000

Aí os tedes, dous temas recén feitos, aínda fumegantes, do disco Oito Destinos que se suman á lista da nosa sección de descargas.

Desta vez os elexidos foron A Esmorga e Identidade.

E si queredes escoitar máis estade atentos, porque a sección seguirá medrando con outros temas do noso último traballo.

Bo proveito!!